ILOILO CITY- Ginapabantayan sang hugot sang Syudad sang Iloilo ang Senator Benigno Aquino Jr. Avenue sa Mandurriao bangud sa sunod-sunod nga mga aksidente sa lugar sa diin may yara na sang mga napatay.
Sa interview sang Bombo Radyo kay Iloilo City Mayor Jerry Treñas, iya ginpahayag nga ginmanduan na niya si Mr. Jeck Conlu, pinuno sang Public Safety and Transportation Management Office, nga magcoordinate sa traffic division sang Iloilo City Police Office, Land Transportation Office ,kag PNP Highway Patrol Group agud matutukan ang Diversion Road kag makapatigayon sang ginakinahanglan nga warningsa mga motorista.
Suno kay Treñas,may ginhatag ini nga 28 ka mga motorsiklo kag walo ka patrol cars sa Iloilo City Police Office kag 12 ka motorsiklo sa Public Safety and Transportation Management Office gani nagakadapat nga gamiton ini para sa pagbantay kag pagpatuman sang pagsulundan sa trapiko agud malikawan ang aksidente kag malagas ang sin-o man nga involved ilabi na sa hit- and -run incidents.
