ILOILO – Igalunsyar sang provincial government ang ‘Bulig Ilonggo’ para sa mga Ilonggo nga may yara sang himata sa anuman nga pungsod sa Middle East.
Sa interview sang Bombo Radyo kay Atty Suezette Mamon, Provincial Administrator iya ginpahayag nga magapahamtang ang provincial government sang Help Desk sa lobby sang Provincial Capitol nga pagatawgon nila nga ‘Bulig Ilonggo’ kag ini ang maga cater sang inquiries kag pamangkutanon sang mga Ilonggo nga may yara sang himata sa Middle East.
Suno kay Mamon ang nasambit nga proyekto ang inisyatibo man sang provincial government bilang sabat sa nagapadayon nga pagsaka sang tensyon sa tunga sang Estados Unidos kag Iran sa diin posible nga maulamid ang pila ka mga Ilonggo nga yara sa mga nasambit nga pungsod.
Dugang sang natungdan, magapatigayon naman sang pagsinapol si Acting Iloilo Governor Christine ‘Tingting’ Garin kag Acting Vice Governor Rolly Distura kaupod ang Department of Foreign Affairs, Overseas Workers Welfare Administration, Department of Labor and Employment kag Philippine Overseas Employment Administration agud istoryahan ang iban pa nga lihok nga mahimo nila ipatigayon agud mabuligan ang mga ma repatriate.
