ILOILO – Posible nga indi naman madayon ang Pasungay Festival sa San Joaquin, Iloilo sa ika duha na nga bes.
Ini matapos ang reklamo sang Animal Kingdom Foundation kag naga alegar nga naglapas sa Animal Welfare Act ang nasambit nga kahiwatan.
Sa interview sang Bombo Radyo kay 1st District Board Member Marcelo Valentine Serag iya ginpahayag nga padayon ang ila pagpaninhuwa nga madayon ang Pasungay Festival apisar nga madamo ang nagapamalabag sini bangud ini ang madugay na nila nga tradisyon kag isa ini sa ginadagsa ka turista sa ila nga banwa.
Suno kay Serag, wala sila sang plano nga islan sang iban nga kahiwatan ang Pasungay Festival bangud nakaandan na sini sa ila nga banwa.
Nahibaluan nga ini na ang ika duha nga tuig nga indi madayon ang Pasungay Festival matapos man nga ginbalabagan sang pila ka mga animal enthusiast.
Santo sa pahayag sang natungdan, nakigsapol na siya sa commitee agud istoryahan ang mga lihok nga ila patigayunon agud madayon ang ila nga kahiwatan bag o pa man ini mag umpisa kun tani sa sa masunod nga semana.
Dugang pa, siya mismo ang nagahimo sang iya kaugalingon nga lihok bagud madayon ang nasambit nga kahiwatan bangud nakita niya nga ini ang lapas lang ordinansa sa provincial ordinance sang 2007 kag ini ang na refer na niya sa Commitee on Tourism agud istoryahan ang nasambit nga ordinansa.
Nagapati man si Serag nga dako ang nangin epekto sang pagpa untat sang Pasungay Festival sa San Joaquin bangud amat-amat na ini nga naganubo.
Sa pihak sini nagpasalig si Serag nga kun indi nila malagas nga matapos ang mga lihok nga ila patigayunon padayon nila ini sa gihapon nga iga duso agud madayon na ini sa masunod nga tuig.
