ILOILO CITY-Gina-respeto sang director sang Bacolod City Police Office ang pahayag ni Pol Lt Col Jovie Espenido nga shabulized city ang syudad sang Bacolod.
Sa interview sang Bombo Radyo kay Pol. Col. Henry Biñas, iya ginpahayag nga posible nga figure of speech lang ini nga tinaga nga gin-gamit ni Espenido.
Suno kay Biñas, sa iya kaugalingon nga paghangop, ang shabulized ang nagalaragway sa mga tawo nga lulong sa iligal nga droga kag wala man sang terminolohiya nga shabulized sa diin ang proper body gid lang gid ang maka determine sini.
Ginpahayag naman ni Biñas nga sang siya ang nagpungko sa Bacolod City Police office, tanan nga mga barangay ang apektado sang iligal nga droga.
Sa subong, sa 61 ka mga barangay, walo na ang drug cleared kag may yara sang 13 pa nga naga- apply.
Suno pa sa iya, indi mahapos ang pagsolbar sang iligal nga droga apang suno kay Biñas, sa dalayon, masolbar gid ang ini nga problema.
Paathag pa niya nga ang dalagko nga mga players ang indi man taga- Bacolod City kag lainlain nga mga pangalan ang ila ginagamit.
Wala man sang marijuana plantation kag shabu laboratory sa siyudad sang Bacolod.
Naglab-ot naman sa P72M ang balor sang iligal nga droga nga nakumpiska sang Bacolod City Police office sa tuig 2019.
