ILOILO CITY-May pila na ka mga anggulo nga ginasundan ang otoridad angot sa pagluthang-patay sa callcenter agent sa Barangay Cuartero, Jaro, Iloilo City.
Ang biktima amo si Alain Muller alyas Kano, 42 anyos sang nasambit nga barangay.
Sa interview sang Bombo Radyo kay Pol. Col. Martin Defensor Jr., director sang Iloilo City Police office, iya ginpahayag nga posible nga ang natabo sa biktima ang may kaangtanan man sa natabo sa iya manghod nga si Mark Muller nga ginluthang- patay sang riding-in-tandem suspects sa Taft North, Mandurriao sang nagligad nga tuig.
Suno kay Defensor, ginasundan man nila ang anggulo nga remnants sang mga drug groups ang responsable sa pagpatay sa iya sa diin sang nagligad nga tuig, gin-straffing pa ang balay sini sa diin suspek ang nasambit nga grupo.
Dugang pa ni Defensor, si Muller ang nangin lider man sang isa ka dako nga grupo sa syudad sang Iloilo.
Nahibaluan nga kahapon nga adlaw, naguwa lamang ang biktima sa ila nga balay kag gilayon nga ginluthang patay sang duha ka mga suspek sa diin nakaangkon ini sang 28 ka mga igo sang bala sa nagkalain-lain nga bahin sang iya lawas.
Narekober sa lugar ang siyam ka empty shells sang 9mm caliber, apat ka empty shells sang .45 caliber kag walo ka mga deformed slugs.
Samtang, nabudlayan pa ang otoridad sa pag-establisar sang mga importante nga impormasyon angot sa pagpatay sa negosyante sa Nabitasan, Lapaz, Iloilo City.
Ang biktima amo si Delfin Britanico , 37 anyos kag anak ni anay Banat Partylist Representative Salvador Buddy Britanico.
Sa interview sang Bombo Radyo kay Police Col Martin Defensor Jr., director sang Iloilo City Police office, iya ginpahayag nga may yara sila sang ginauyatan nga witness apang limitado palang ang nahatag sini nga pahayag.
Apang suno kay Defensor, gintuad sang testigo nga nakita niya nga may nakabais ang biktima sa isa ka itom nga van kag Tagalog ang ginagamit nga lenggwahe sang wala makilal-an nga tawo.
Magluwas diri, ginasundan man sang kapulisan ang anggulo nga may kaangtanan sa pagpangsapote sang biktima sadto sa diin naglab-ot pa ini sa pagkinasuhay.
Dugang pa ni Defensor, mahimo nga planado ang pagpatay sa biktima bangud antes ini ginluthang, nakatawag pa ini sa iya asawa kag nakapanugid nga may nagasunod sa iya.
Nahibaluan nga palaligban man ang pagkadula sang cellphone sang biktima nga ginapatihan ginkuha sang mga suspek nga suno kay Defensor dako kutani ang mabulig sa imbestigasyon.
