ILOILO – Ginklaro ni Second District Board Member Jun Mondejar nga wala nila gindumilian ang pagbaligya sang tingi-tingi nga produktong petrolyo sa probinsya sang Iloilo.
Sa interview sang Bombo Radyo kay Mondejar, iya ginpahayag nga base sa ginpropose nila nga ordinansa ang ginadumilian amo ang paggamit sang botelya kag iban pa nga wala gin rekomendar nga container sa pagbakal kag sa pagbaligya sang produktong petrolyo.
Suno kay Mondejar, katuyuan sang nasambit nga ordinansa amo ang likawan ang sunog, protektahan ang palibot kag ikaayong lang lawas sang mga pumuluyo kag agud man mangin patas sa mga lisensyado nga mga manugbaligya.
Dugang sang natungdan, may yara sila sang ginrekomendar nga mga containers nga mahimo gamiton sa pagbakal sang tingi-tingi nga gasolina ukon krudo.
Santo sa pahayag ni Mondejar ang mga madakpan nga nagabaligya sa botelya kag wala nagagamit sang ginrekomendar nga suludlan ang magapangatubang sang nagakaigo nga silot kag penalidad sa diin ang first offense warning lang, second offense P4,000 kag pagka preso sang isa tubtob anom ka bulan, third offense, P5,000, pagkapreso sang 1 tubtob sa anom ka bulan kag kanselasyon sang business permit kun ang manugbaligya ang lisensyado nga retailer.
