POTOTAN, ILOILO- Naglab-ot sa masobra tunga sa milyon ka pesos ang nataban sang mga kawatan sa balay sang punong brgy sa Pototan, Iloilo.
Ang tag-iya sang balay amo si Punong Brgy. Amancio Velasco sang Brgy. Cahaguic-hican, sa nasambit nga banwa.
Sa interview sang Bombo Radyo kay Police Major Ronnie Brillo, hepe sang Pototan Municipal Police Station , iya ginpahayag nga nag-agi ang mga kawatan sa likod nga parti sang balay paagi sa paglukit sang pwertahan rason nga nakuha nila ang vault nga nagaunod sang kwarta.
Suno kay Brillo, nakit-an nalang ang ginwasak nga vault sa talamnan kag wala na sang unod nga kwarta nga nagalab-ot sa P550,000.
Magluwas sa kwarta, nakuha man sang mga kawatan ang bulawan nga alahas nga ginalakipan sang singsing, polseras kag kulintas.
Nahibaluan nga wala sang tawo sa nasambit nga balay sang natabo ang pagpangawat.
