Ginbuyagyag sang isa ka top adviser sang gobyerno sang Japan nga ang kapaslawan sa pagpatigayon sang quarantine measures nga ginapatuman sa Diamond Princess cruise ship ang kabangdanan kun ngaa padayon nga nagadamo ang mga pasahero nga nagapositibo sa COVID-19.
Madumduman nga ginpaidalom sa 14 ka adlaw nga quarantine sa Yokohama, Japan ang American-owned cruise ship sang damlag lang matapos makumpirma nga may yara sang coronavirus outbreak sa barko.
Nahibaluan nga nagdangat sa 705 ka tao ang nalatnan sang virus samtang naka-quarantine sa diin apat na diri ang napatay.
Sa nasambit nga barko man narekord ang pinaka madamo nga numero sang coronavirus case sa gwa sang China.
Suno kay Dr. Nohorio Ohmagari, direktor sang Disease Control and Prevention Center sa Japan, posible nga indi maayo ang pagpatigayon sang quarantine procedures sa cruise ship.
Dugang sang natungdan, wala naka-isolate ang mga crew members sang barko apisar nga naka quarantine ini gani posible nga nalatnan sila sang mga kaupod nila nga positibo sa coronavirus.
Samtang, nagdepensa naman Japan Health ministry sa diin ila ginpahayag nga nangin regular ang ila pagpakig-angot sa infection control team kag external experts agud ma monitor ang kahimtangan sang tanan nga pasahero kag tripulante sa barko.
