ILOILO – Huol para sa mga tricycle drivers kag pasahero ang pagtan-aw sang Pinagkaisang Samahan ng mga Tsuper at Operator Nationwide (Piston) – Panay sa mandu sang Department of Interior and Local Government nga pagdumili sa mga tricycle sa national road.
Sa interview sang Bombo Radyo kay Edgar Salarda, presidente sang Pinagkaisang Samahan ng mga Tsuper at Operator Nationwide (Piston) – Panay iya ginpahayag nga mangin huol lang para sa tanan ang nasambit nga mandu bangud magluwas sa madulaan sang palangabuhian ang mga tricycle driver mangin doble ma ini nga gastos para sa mga pasahero.
Suno kay Salarda, nagapati sila nga nagakadapat lang nga bawion na sang DILG ang nasambit nga mandu madamo sang mga drivers ang maapektuhan sini.
Dugang sang natungdan, antes ipatuman ang nasamabit nga mandu mas nagakadapat nga amyendahan ang layi agud mahatagan sang dalan ang mga driver, hatagan sang alternatibo nga pangabuhian ang mga maapektuhan.
Nanawagan man si Salarda sa tanan nga maghugpong kag ipakigbato ang kinamatarong sang mga tricycle driver nga nagabaka-baka gid para sa ila tagsa ka mga pamilya.
