Ginkansela sang Department of Tourism ang nationwide month-long sale bilang kabahin sang pagsaulog sang 2020 Philippine Shopping Festival bangud sa padayon nga pagsaka sang kaso sang Coronavirus Disease 2019 (COVID)-19 sa bilog nga kalibutan.
Ang nasambit nga mandu ang may yara man sang epekto sa turismo sang Pilipinas matapos nga ginpatuman ang travel ban sa China, Hong kong kag Macau.
Sa record sang National Economic and Development Authority, ginabanta masobra sa P22 bilyon ang posible madula sa kita sang turismo sa pungsod sa sulod sang isa ka bulan.
Suno naman sa Department of Tourism, kun magdugay tubtob sa Abril ang kanselasyon sang flights, posible nga magtaas tubtob sa masobra P40 bilyon ang madula sa tourism sector.
Sa pagpaathag ni Department of Tourism Secretary Bernadette Romulo-Puyat, indi mahimo nga ipaiway ang safety sang publiko para lang masabat ang epekto sa ekonomiya rason kun nga-a ginkansela ang plano nga mall sale.
