ANTIQUE – Lima ka igu sang bala sa ulo kag lawas ang gintunaan sang kamatayon sang isa ka sais-anyos nga bata nga babayi sa Bayo Pequeño, Anini-y, Antique.
Sa interview sang Bombo Radyo kay Police Lieutenant Richard Tobias, officer-in-charge sang Anini-y Police Station, iya ginpahayag nga nagakatulog lamang ang bata nga babayi sa sulod sang isa ka kwarto sa ila balay sang natabo ang insidente.
Suno kay Tobias, hubog kag nagamaoy ang suspek nga si Glen Unica sa gwa sang balay sang biktima.
Ginapahayag nga tuyo kuntani ni Unica nga awayon si Jeros Soberanos, amay sang biktima, bangud sa ila daan nga hiligut-anon.
Sa pagdumdom nga yara sa sulod sang kwarto si Soberanos, nagpalupok si Unica kag suno kay Tobias, bangud human sa kawayan ang balay ni Soberanos, na-tadtad gid ang dingding sini.
Dugang pa ni Tobias, nagtuyo pa ang suspek nga sudlon ang balay apang sang yara na ini sa mayor nga puertahan, nagsugataay sila ni Soberanos.
Ginbuno ni Soberanos si Unica.
Suno pa kay Tobias, wala na na-recover ang pusil nga gingamit sang suspek sa lugar sang krimen.
Ginapahayag nga may lakip nga ‘love triangle’ sa hiligut-anon sang duha, sa diin, gina-alegar nga nagapangimon ang suspek kay Soberanos bangud sa ka-live in partner sini nga una naman nga nagbulag sa iya.
Kaso nga murder kag illegal possession of firearms ang pangatubangon sang suspetsado.
