ILOILO CITY – Ginalauman sang Iloilo City Police Office (ICPO) nga mapabilin ang matinlo nga record sang kapulisan kun iligal nga droga ang pagahambalan.
Kahapon nga adlaw, ginpamunuan ni PCol Eric Dampal, director sang ICPO, ang pinakauna nga Random Drug Testing sa iya administrasyon.
Sa interview sang Bombo Radyo kay Dampal, iya ginpahayag nga sa bulig sang Regional Crime Laboratory sang Police Regional Office 6 (PRO-6), ginatinguhaan sang iya pamunuan nga matapos ang surprise random drug testing sa 120 ka mga pulis sa Iloilo City Police Station 1, La Paz Police Station, Jaro Police Station, Arevalo Police Station, Molo Police Station kag Mandurriao Police Station.
Nahibaluan nga sa administrasyon ni PCol. Martin Defensor, ang anay city director sang ICPO nga ginbuslan ni Dampal, wala sang nagpositibo sa drug test kag ini ang ginatinguhaan nga mapabilin sang mga kapulisan.
Ang surprise random drug test ang kabahin sang implementasyon sang Philippine National Police Internal Cleansing Program paagi sa PNP Memorandum Circular No. 2019-027.
