ILOILO CITY – Padayon pa nga ginapadalman sang Arevalo Police Station ang imbestigasyon kaangot sa lalaki nga nasapwan-patay sa Project 6, Barangay Sooc, Arevalo, Iloilo City sang Biyernes, Marso 6.
Ang biktima amo si Christian Cofreros, 25-anyos, residente sang Bacolod City kag ginapahayag nga nagatrabaho sa isa ka lending company.
Sa interview sang Bombo Radyo kay PCapt Shella Mae Sangrines, tagpamaba sang Iloilo City Police Office (ICPO), iya ginpahayag nga ginalantaw pa sang kapulisan ang tanan nga anggulo sang krimen ilabi na ang rason kun ngaa sa syudad sang Iloilo ini nasapwan samtang una naman ini nga nadeklarar nga missing sa syudad sang Bacolod.
Sa subong suno kay Sangrines, indi pa mapahibalo sa publiko ang posible motibo sa krimen apang may mga persons of interest naman nga ginasundan ang otoridad.
Indi man makumpirma ni Sangrines kun bala may kaangtanan sa iligal nga droga ang kamatayon sang biktima.
Base sa imbestigasyon kag mga ebidensya, malayo man suno sa natungdan nga may kaangtanan ang kamatayon ni Cofreros sa kamatayon ni Angel Lademora, ang lalaki nga ginluthang-patay sang riding-in-tandem suspects sa Brgy. Democracia, Jaro, Iloilo City sang Marso 5.
