ILOILO – Ginalauman nga maga-abot na sa Iloilo sa Mierkules, Marso 25, ang 500 ka test kits nga gin-order ni anay Iloilo 4th District Congressman Dr. Ferjenel Biron nagikan sa South Korea.
Sa interview sang Bombo Radyo kay Lemuel Fernandez, tiglawas sang Endure Medical nga kompaniya ni Biron, iya ginpahayag nga kun mag-abot na ang nasambit nga Seegene COVID-19 PCR-based testing kits, ihatag na ini nga suplay direkta sa Western Visayas Medical Center (WVMC) sa Mandurriao — ang napilian nga COVID-19 hospital sa Western Visayas.
Suno kay Fernandez, mabudlay na sa subong ang pag-order sa supplier sa South Korea bangud didto man nagakuha sang suplay ang European countries, apang pahayag sang natungdan, nauna na nga naka-contact si Biron amo nga natigayon ang pag-purchase.
Kahapon nga adlaw, nabaton naman sang Iloilo Provincial Government ang iban pa nga Personal Protective Equipment (PPE) nga gindonar man sang pamilya ni Biron.
Suno kay Fernandez, ini ang ginalakipan sang 20,000 ka surgical mask, 15,000 ka head covers, kag 2,000 ka N95 masks.
Ini nga PPE ang natalana nga ipanagtag sa nanuhay-tuhay nga kabanwahanan sa probinsya.
