ILOILO CITY – Ginkumpirma sang Department of Health 6 ang duha ka dugang nga kaso sang Coronavirus Disease 2019 sa Western Visayas.
Sa ginpatigayon nga press conference sang Department of Health 6 kaupod ang Inter-Agency Task Force kag Office of the Civil Defense ginpahayag ni Dr. Marlyn Convocar direktor sang Department of Health 6 nga ang duha ka dugang nga kaso amo ang isa ka 61-anyos nga babayi nga nagikan sa Iloilo City kag 45-anyos nga lalaki nagikan sa Capiz, lunsay may travel history sa Metro Manila kag yara na sa estable nga kondisyon.
Padayon naman ang ginapatigayon nga contact tracing sa mga naka close contract sang duha ka pasyente.
Suno kay Convocar, indi pa sila makahambal kun sa diin sa Iloilo ang nagpositibo sa COVID-19 bangud katungdanan na ini sang ospital sa diin naka confine ang pasyente.
Nahibaluan nga sa subong may yara na sang apat ka kumpirmado nga kaso sang COVID-19 sa Western Visayas sa diin una na nga ginkumpirmar ang nagikan sa Bacolod City kag sa Guimbal, Iloilo.
Sa subong, ginahulat pa ang resulta sang 44 ka swab sample nga ginpadala sang DOH-6 sa Research Institute for Tropical Medicine kag ginalauman nga maggwa ini matapos ang pito ka adlaw.
Antes ang ginpatigayon nga press conference, ginsapol naman sang Department of Health ang nagkalain-lain nga ahensya sang gobyerno sa diin nagpasar sila sang tatlo ka resolusyon.
Una na diri ang naga rekomenda nga magdesignar sang isa ka ospital nga pahamtangan sang mga pasyente sang COVID-19 sa kada probinsya.
Ika duha diri amo ang naga rekomenda nga magpahamtang sang quarantine facility sa kada Local Government Unit kag ikatatlo amo ang pagpasangkad sang ginapatigayon nga contact tracing sa mga naka close contact sang mga nagpositibo sa COVID-19 sa rehiyon 6.
Samtang suno naman kay Dr. Mary Jane Juanico, pinuno sang Infectious Disease Section sang Department of Health 6 may yara na sang mga accredited nga cremation facilities sa Western Visayas nga naga cremate sang bangkay sang mga Persons Under Investigation nga napatay samtang ginahulat ang resulta sang ila nga test.
Dugang sang natungdan, nagakadapat nga ma cremate ang bangkay sa sulod sang 12 ka oras matapos mapatay.
