ILOILO CITY – Indi dapat nga mangin ‘dumping ground’ ang syudad sang Iloilo para sa mga pasyente nga infected sang coronavirus disease 2019 (COVID-19).
Ini ang ginaduso sang nagkalain-lain nga medical specialty societies matapos nga gindesignar sang Department of Health (DOH) ang Western Visayas Medical Center (WVMC) bilang COVID-19 hospital para sa Rehiyon 6.
Apisar positibo sa nangin lihok sang DOH, ginpahayag ni Dr. Roy Joseph Trinidad, presidente sang Philippine College of Surgeons Panay Chapter, nga dapat sa gihapon nga i-capacitate ang iban nga ospital sa iban nga probinsya — Capiz, Antique, Aklan, Guimaras, kag Negros Occidental.
Sa interview sang Bombo Radyo kay Dr. Trinidad, iya ginpahayag nga mas mataas ang risgo nga maglapta ang virus kun i-byahe pa ang pasyente gani nagakadapat nga istrikto nga ipatuman ang border restrictions.
“The reason why there is a border control is to prevent the movement of the people. If we transfer the patient, if we allow the transfer, we are not actually containing the virus. We are spreading out the virus,” pahayag ni Dr. Trinidad.
Magluwas diri, ginpahayag man sang natungdan nga kun mag-gutok na ang WVMC, indi nila luyag nga wala sang kadtuan ang mga pigado nga apektado nga pumuluyo sa Iloilo bangud indi man sila makasarang magbayad sa pribado nga ospital.
Sa bahin sang kun bala ini isa ka diskriminisyon sa taga-iban nga probinsya, suno kay Dr. Trinidad, “We, doctors, are not going away from our responsibilities. It is a part of the managemnet of COVID-19.”
Naintindihan man sang natungdan nga ang DOH ang may otoridad sa bilog nga rehiyon, kag indi sa syudad kag probinsya lang sang Iloilo.
Apang pahayag ni Trinidad, may yara sang mga eksperto sa iban nga probinsya kag may mga equipment nga sarang magamit ang mga pribado nga ospital.
“It is just a question of coordinating the private and government hospitals so the the private hopitals can lend, or even donate, their available equipment,” dugang pa ni Dr. Trinidad.
“IBAN PA NGA URGENT APPEAL”
Lakip man sa ginaduso kag gina-apelar sang mga medical specialty societies amo ang mga masunod: pag-consider sa mga Persons Under Investigation (PUI) bilang positive kag gilayon nga pagpatigayon sang contract tracing antes pa man mag-gwa ang test results; paghatag sa mga health frontliners sang Personal Protective Equipment (PPE); mandu gikan sa DOH nga naga-dumili sa pag-admit sa COVID-19 patients sa non-COVID dedicated hospital — pribado man ukon pampubliko; kag, ang paggamit sang test kits kag pagsigurado nga ang gina-test lang amo ang naka-meet sang crietria.
Lakip sa mga nagpirma sang amo nga urgent appeal amo ang Iloilo Medical Society, Philippine College of Surgeons Panay Chapter, Philippine Society of General Sugeons Panay Chapter, Philippine College of Physicians Western Visayas Chapter, kag Philippine Society of Anesthesiologist Iloilo Panay Chapter, Philippine Pediatric Society Western Visayas Chapter, kag ang Philippine Obstetrics and Gynecologic Society.
———
Photo Courtesy: Ian Paul Cordero
