ILOILO – Nakadepende sa batasan sang mga pumuluyo sa probinsya sang Iloilo ang kalawigon sang pagpatuman sang Enhanced Community Quarantine.
Sa interview sang Bombo Radyo kay Iloilo Governor Arthur Defensor Jr., iya ginpahayag nga kun matig-a ang ulo sang mga pumuluyo kag wala nagasunod sa mga pagsulundan kaangay sang physical distancing kag pagpabilin sa balay, mahimo nga i-extend pa ang implementasyon sang lockdown.
Nahibaluan nga sa Executive Order 080 nga ginpapanaug ni Defensor, epektibo halin Marso 20 tubtob Abril 14 lang ang enhanced community quarantine.
Maayo man subong suno sa gobernador bangud talalupangdon nga nag-gamay na ang mga salakyan kag mga tawo nga makit-an sa mga dalanon.
Liwat nga nagpanawagan si Defensor nga tumanon gid ang household quarantine agud malikawan na ang pagtaas pa sang numero sang Persons Under Monitoring may kaangtanan sa coronavirus disease 2019.
Sa bahin naman sang suplay sang pagkaon sa probinsya, suno kay Defensor, may yara na sang cash assistance nga ginhatag ang Iloilo Provincial Government sa mga kabanwahanan.
Ini ang ginabug-usan sang P43.5 million — tag-P1 million ang ihatag sa tagsa ka local government unit, samtang P1.5 million naman ang ihatag sa banwa sang Guimbal sa diin nagapuyo ang isa ka COVID-19 positive nga pasyente.
Suno kay Defensor, praktikal lang nga cash assistance ang ginhatag sang Iloilo Provincial Government kag santu sa guidelines, ang local government unit na ang bahala nga mag-desisyon sang dapat ipanghatag sa mga pumuluyo bangud sila ang mas nakahibalo sang ginakinahanglan sang ila lugar.
