ILOILO CITY – ‘Close to impossible’ nga patigayunon ang total lockdown sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga indi matuod ang nagalagaw nga impormasyon nga may yara na sang plano ang Iloilo City Government nga pasakaon pa sa ‘next level’ ukon total lockdown ang syudad nagikan sa enhanced community quarantine.
Suno kay Treñas, duha pa lang ang kumpirmado nga positibo nga kaso sang coronavirus disease 2019 sa syudad kag sa subong, adlaw-adlaw ang ginahimo nga assesment sang otoridad.
Pahayag sang alkalde, mabudlay na gani sa subong ang pagpanagtag sang pagkaon sa mga komunidad gani nga imposible na gid ang pag-distribute sini sa tion nga total lockdown ang matabo.
Ang kondisyon lang suno sa natungdan amo ang kooperasyon sang mga pumuluyo: pagpabilin sa balay, pagtuman sa curfew ordinace, kag pagsunod sa physical distancing measure.
May kaangtanan naman sa kun bala, may yara sang plano nga palawigon ang enhanced community quarantine sa Iloilo City, nagpahayag si Treñas nga, “Let’s cross the bridge when we get there.”
Suno kay Treñas, kun basehan ang iya personal nga kagustuhan, luyag na niya nga liwat buksan ang syudad sa Abril 14.
Apang suno sa iya, padayon pa subong ang day-to-day assessment.
