ILOILO – Indi pa masarangan sang banwa sang Guimbal ang plano nga pagpatuman sang lockdown sa ila nga banwa.
Sa interview sang Bombo Radyo kay Iloilo Vice Governor Christine Garin, iya ginpahayag nga sa subong indi pa masarangan nga sagudon ukon tatapon sang banwa sang Guimbal ang tanan nga mga pumuluyo sa tion nga ipaidalom sila sa lockdown ukon kabigon nga PUM ang mga pumuluyo sa ila nga banwa.
Suno kay Garin, sa subong wala pa sang kumpirmasyon ang nasambit nga plano apang nagakinahanglan suno sa natungdan nga preparahan ini bangud masobra sa 30,000 ang populasyon sang Guimbal nga kinahanglan nila sagudon kag pakan-on.
Dugang sang natungdan, ang mahimo lang nila subong amo ang limitahan kag i-monitor ang nagagwa kag sulod sa banwa.
Nakapalab-ot naman sang P1.5milyon nga bulig ang Provincial Government nga mahimo na nga mapanagtag sa mga pumuluyo sa banwa sang Guimbal.
