ILOILO CITY – Dapat nga may isa lang ka tingog ang mga national government agencies agud nga indi mabutang sa alang-alang ang mga local government units (LGUs) sa mga lihok nga ginapatuman.
Ini ang pahayag ni Iloilo City Mayor Jerry Treñas matapos madismaya sa wala nagasantu nga instruksyon sang Department of the Interior and Local Government (DILG) kag sang Department of Social Welfare and Development (DSWD) may kaangtanan sa deadline sang pag-sumite sang listahan sang mga posible nga maka-benepisyo sa Social Amelioration Program.
Suno kay Treñas, Abril 3 ang ginhatag nga deadline sang DILG, apang sunod man nga nagpahayag ang DSWD nga wala sila nakahatag sang amo nga petsa.
Una na nga gintawag ni Treñas nga ‘stupid deadline’ ang amo nga petsa bangud suno sa iya, wala sang sin-o man nga LGU ang makatapos sa sa paglista sang benepisyaryo kag maka-comply kun amo ini ka-dasigay ang matabo.
Ang Department of Education (DepEd) naman suno sa natungdan ang madamo pa sang ginakinahanglan para lang matugtan ang syudad nga gamiton ang isa ka eskwelahan bilang isolation facility.
Pahayag sang alkalde, wala na sila nakahibalo kun ano ang dapat himuon bangud naipit sila sa sitwasyon.
Wala man nakalusot ang Department of Health (DOH) sa dismayado nga panan-awan sang alkalde.
Suno kay Treñas, daw wala na sang direksyon nga padulungan ang syudad kun tuman ka hinay ang akto sang nasambit nga pamunuan.
Una na nga nagpahayag si Treñas nga indi siya maka-intindi kun ngaa wala sang emergency procurement nga ginahimo ang DOH may kaangtanan sa mga test kits nga kinahanglanon sa subong.
