ILOILO CITY – Nagpabutyag sang kalain sang buot si 3rd District Board Member Jason Gonzales ini matapos nga nakalab-ot sa iya ang pila ka kaso sang pagdiskrimina sa mga Lambunaonon sa mga kaiping nila nga banwa.
Ini bangud may yara na sang duha ka positibo nga kaso sang COVID-19 sa Lambunao
Sa interview sang Bombo Radyo kay Gonzales, iya ginpahayag nga indi malikawan nga maglain ang iya nga buot bangud kun ang banwa sang Lambunao mahimo nga nagabaton sang mga Persons Under Investigation gikan sa iban nga banwa sa 3rd District apang ang mga pasyente nga gikan sa ila nga banwa wala ginabaton sa iban nga mga ospital.
Suno kay Gonzales, nagapangabay siya nga kun tani indi lang pag idiskrimina ang tawo base sa ila nga ginhalinan.
Nagpanugyan naman ang natungdan sa mga kaiping nila nga banwa nga indi magpangduha-duha nga magbaton sang mga pasyente gikan sa Lambunao ilabi pa subong nga sarado na ang General kag Pediatric section sang Dr. Ricardco Y. Ladrido Memorial Hospital gani kinahanglan pa sang mga taga Lambunao nga magpadulong sa kaiping nga banwa nga amo ang Calinog kag Janiuay agud makabaton sang medical treatment.
Dugang sang natungdan ang ginabaton nalang subong sa Dr. Ricardco Y. Ladrido Memorial Hospital amo ang mga emergency cases kag animal bite bangud ini ang designated COVID hospital sa diin dal-on ang mga Persons Under Investigation gikan sa iban nga banwa sa 3rd district.
