Nakabalik na sa kalibutan ang ika-labing una nga microsatellite sang Pilipinas nga ‘Diwata-1’ matapos ang apat ka tuig nga pagtinir nila sa kahawaan.
Ginkumpirma sang Space Technology and Applications Mastery, Innovation and Advancement sang University of the Philippines nga yara na sa decommissioning stage ang microsatellite sang Marso 23.
Ini bangud sa ginapahayag padayon nga pagnubo sang altitude sini gikan sa duta.
Nahibaluan nga magkaupod nga gintukod sang pila ka mga Pinoy engineers kag mga scientists gikan sa University of the Philippines Diliman ang microsatellite kaupod man ang Tohoku University kag Hokkaido Univesity sa Japan.
Ini man ang ginsuportahan sang Department of Science and Technology.
Madumduman nga ginlunsyar sa International Space Station ang Diwata-1 sang gintalikdan nga Marso 23, 2016 paagi sa Atlas-V rocket sa Cape Canaveral, Florida nga ginbuy-an sa orbit sang astronaut nga si Tim Peake sang Abril 27, 2017.
Base sa data sang Space Technology and Applications Mastery, Innovation and Advancement (STAMINA4Space), na-cover sang Diwata-1 ang 38% ukon 114,087-squaremeter nga duta sa Pilipinas.
Ginabanta sa 22,643 ka bes man nga ginlibot sang Diwata-1 ang kalibutan kag halos 5,000 ka bes nga nag agi sa Pilipinas.
May yara man ini sang 17,000 ka mga imahe nga nakuha gikan sa kahawaan kag kalabanan diri ang imahe sang nangin epekto sang mga nakaligad nga kalamidad nga nag igo sa bilog nga kalibutan.
