ILOILO CITY – Bulig ang ginasinggitan sang mga Overseas Filipino Workers sa Saudi Arabia ini bangud kalabanan sa ila ang nadulaan sang trabaho kag may yara man sang gibuhinan ang sweldo kadungan sang pagnubo sang ekonomiya sang nasambit nga pungsod kag amat-amat nga pagsarado sang mga negosyo.
Suno kay Bombo International Correspondent Kenneth Abendaño Edar direkta sa Dammam, Saudi Arabia siya mismo ang nadulaan na sang trabaho kag duha naman ka bulan nga wala sya sang sweldo.
Dugang sang natungdan, may yara pa kun tani sya sang kuhaon nga sweldo sa iya employer lakip man ang iban pa nga mga benepisyo apang indi na ini pag-ihatag bangud suno sa iya emloyer gamiton nila ini sa pagbakal sang iya ticket kag exit visa pauli sa Pilipinas.
Santo sa pahayag ni Edar, wala na ginrenew sang kompanya ang ila nga kontrata bangud napilitan na ini nga magsarado matapos nga magnubo ang ekonomiya sang Saudi Arabia bangud sa pagpatuman sang lockdown nga gintuga sang Coronavirus Disease 2019.
Sa subong suno sa natungdan, wala pa sang maathag nga plano ang Overseas Workers Welfare Administration kun san o sila makapauli sa Pilipinas ukon makapauli pa bala sila sa ila tagsa ka mga pamilya.
