ILOILO CITY– Tuman na ka klaro para sa mga konsomidor kag pumuluyo sang syudad sang Iloilo, nga ang MORE Electric and Power Corporation na ang naga-isahanon nga power distributor.
Ini ang pahayag ni Atty. Hector Teodosio, legal counsel sang More Power, matapos ginbawi sang Business Permits and Licensing Office ang business permit sang Panay Electric Company.
Sa interview sang Bombo Radyo kay Teodosio, iya ginpahayag nga maathag na para sa tanan nga ang More Power, na ang naga-uyat sang tanan nga distribution assets.
Suno kay Teodosio, maathag nga ginbasura sang Korte ang mosyon nga ginpasa sang anay electric power provider.
Ginpahayag ni Teodosio nga ang masunod nga lihok amo nga pagatan-awun sang husgado, kun pila ang balor sang tanan nga assets sang anay utility provider, kag kun magdangat ini sa P480 million, may yara na nga daan sang nadeposito nga kwarta sa bangko ang More Power.
Kun magnubo naman sa nasambit nga kantidad ang balor sang tanan nga distribution assets, igabalik sang Panay Electric Company ang sobra nga kwarta.
Ang malahalon sa subong suno sa natungdan, amo nga ang More Power ang ginakilala sang Korte, Energy Regulatory Commission kag sang Iloilo City Government.
