ILOILO CITY – Nakahanda na ang syudad sang Iloilo sa pagpaidalom sa low risk sa diin pagasundon ang pagsulundan sa ‘new normal’.
Sa interview sang Bombo Radyo kay Iloilo City Mayor Jerry Treñas, iya ginpahayag nga nakigsapol na sya sa mga katapo sang transport sector, pamunuan sang mga ospital kag mall sa syudad agud hitsuon ang ila mga plano sa tion nga ipaidalom na sa low risk ang syudad nga maga sugod sa lunes.
Suno kay Treñas, base sa mga plano nga ginpresentar sa iya sang mga stakeholders nakit-an niya nga nakahanda na ang tanan sa pagsugod sang ‘new normal’ sa syudad.
Sa pihak sini, nagpanugyan naman ang pamunuan sang mga ospital nga nagakadapat sa gihapon sundon ang mga pagsulundan nga ginhatag sang Department of Health bangud tubtob nga wala pa sang bulong sa Coronavirus Disease 2019 (COVID-19) makabig sa gihapon nga delikado ang sitwasyon.
Sa bahin naman sang pamunuan sang mga malls sa syudad, santo sa pahayag sang alkalde nagpasalig sila nga ginahitso na nila ang ila mga plano kag pagsulundan sa ila liwat nga pagbukas sa masunod nga semana.
Sa iya naman nga pag inspeksyon sa bahin sang transport sector, nakit-an niya ang kahandaan sang mga public utility jeepneys sa diin napahamtangan na sang separator nga plastic agud ma obserbar ang physical distancing.
Natalana nga makigsapol si Treñas kaupod ang COVID team sang syudad kag Regional Inter-Agency Task Force subong nga adlaw agud hitsuon kag tapuson ang mga pagsulundan para sa pagpaidalom sa syudad sa low risk.
Dugang sang natungdan, ginatun-an na nila kun bala tugutan na ang pagpatigayon sang misa lakip man ang pagpahanugot sa pag dine in sa mga kalan-an.
