ILOILO CITY– Nag-umpisa na subong nga adlaw, Mayo 14, ang More Electric and Power Corporation sa ‘Operation Kontra Jumper’ agud nga madula na ang illegal connection sa syudad sang Iloilo.
Sa Brgy. Hipodromo sa City Proper, nakit-an kahapon, Mayo 13, ang illegal connection apang sang ila ginbalikan kaina sang aga, nakakas na ini kag magluwas diri, may nakit-an man nga isa ka balay nga illegal nga naga-angot sa poste.
Sa interview sang Bombo Radyo kay Emma Macaventa, tag-iya sang nasambit nga balay, iya ginpahayag nga sa poste sila naga-angot bangud ginkuha sang Panay Electric Company ang ila nga kuntador matapos napaslawan nga makabayad sang bill.
Suno kay Macaventa, gintinguhaan man niya nga bawion ang ila nga kuntador apang ginsukot siya sang Panay Electric Company sang P100,000.
Bangud wala sang inugbayad, wala na lang niya ginkuha ang kuntador kag mas ginpili nga mag-angot sang kuryente direkta sa poste.
Nakahibalo man si Macaventa nga sala ang iya ginhimo kag gin-abisohan siya sang More Power nga mag apply na lang sang panibag-o nga kuntador.
