ILOILO CITY – Nagpatigayon sang mass testing ang Police Regional Office 6 sa ila mga personnel.
Sa interview sang Bombo Radyo kay Pol Lt Col Gilbert Gorero, acting information officer sang Police Regional Office 6 iya ginpahayag nga ini ang kabahin man sang mandu ni Police Regional Office 6 Director BGen Rene Pamuspusan kay PCOL Maria Chona Wamilda, pinuno sang Regional Health Service 6 nga ipaidalom sa swab test ang pila ka mga personnel sa rehiyon agud masiguro nga negatibo sila sa Coronavirus Disease 2019.
Suno kay Gorero, antes ang mass testing nagpatigayon anay sang training sa pag swab test ang Iloilo City Health Unit nga ginapamunuan ni Annabelle Rosario Blancaflor sa 22 ka mga Medical Reserve Force.
Gindesignar naman nga Sub-task Group Health Management ang Regional Health Service 6 sa Adiministrative Support to COVID-19 Operation Task Force nga amo ang may katungdanan sa pag update sang status sang mga personnel sang Police Regional Office 6 nga ginakabig suspect, probable kag positibo sa Covid-19 lakip man ang pagmonitor sa ila pagkatapos sang quarantine ukon treatment.
Matapos ang training, ginpatigayon ang swabbing test (RT-PCR) sa 78 ka mga personnel sang Police Regional Office 6 sa diin 26 diri ang gikan sa Headquarter Service, 22 sa Regional Health Service kag 30 gikan sa Iloilo Police Provincial Office.
Ginprayoridad naman ang mga personnel nga yara nakahamtang sa mga Quarantine Control Points kag nagapatigayon sang checkpoint.
Ang first batch sang swab test ang ginpatigayon sa Camp Delgado.
