MANILA – Ginpangunahan ni Presidente Rodrigo Duterte ang simultaneous Commencement Exercises sang Philippine Military Academy ‘MASIDLAWIN’ Class of 2020 kag sang Philippine National Police Academy ‘MANDAYUG’ Class of 2020.
Ginpaagi sa video conference sa Malacañang ang paghatag sang marching order ni Presidente Duterte kun sa diin ang PMA ‘MASIDLAWIN’ Class ang nagtipon sa Fort General Gregorio H. Del Pilar sa Baguio City samtang ang PNPA ‘MANDAYUG’ Class ang nagtipon sa Camp General Mariano N. Castañeda sa Silang, Cavite.
Ang simultaneous commencement exercises ang limitado lamang sa graduating classes kag istrikto nga ginpatuman ang two-meter rule seating arrangements.
Ini ang labing una nga simultaneous virtual commencement exercises nga ginpangunahan sang Commander-in-Chief subong nga may Coronavirus Disease 2019 (COVID-19) pandemic.
Ang 196 graduates sang PMA MASIDLAWIN class ang ginpangunahan ni Cadet First Class Gemalyn Sugui sang Echague, Isabela samtang si Cadet Lei Anne Bancio Palermo sang Zamboanga City naman ang nagpanguna sa 277 graduates sang PNPA MANDAYUG class kun sa diin ang duha ka top cadets ang nakabaton sang house and lot nga balor P2 million.
Ang class “goats” naman ang makabaton sang Rock Island Armory caliber .45 pistol.
Suno kay Presidente Duterte, nagakadapat nga magpanindugan ang mga PMA kag PNPA graduates ilabi na subong nga madamo na ang pagbag-o sa kalibutan.
Ginpahayag man ni Presidente Duterte nga kun tani indi makaapekto ang COVID-19 sa kalipay nga nabatyagan sang mga graduates kadungan sang ila pagtapos sa pagtuon pagkatapos sang pila ka tuig nga pagpangabudlay.
Kadungan sini, nagpahayag man sang paglaum ang Presidente sa incoming military kag police officers nga ipabilin ang pagpalangga sa pungsod, pagkatampad, pag-ulikid sa nagakinahanglan kag ang pagsunod sa layi.
Wala man napunggan sang Commander-In-Chief nga magpabutyag sang kalipay bangud nga may magadugang naman nga military kag police officers nga amo ang magapangapin sa Pilipinas.
