ILOILO CITY- Ginkumpirma ni Iloilo City Mayor Jerry Treñas nga ginpahanugutan na sang Inter-Agency Task Force ang pagpatigayun sang non-contact sports kaangay sang biking, jogging, brisk walking, tennis, kag badminton.
Sa exclusive interview sang Bombo Radyo kay Iloilo City Mayor Jerry Treñas, iya ginpahayag nga ang nasambit nga mga buluhaton ang ginpahanugutan na sa syudad.
Suno kay Treñas, apisar sang pagbalik sang nasambit nga mga aktibidad, kinahanglan man sa gihapon mag-obserba sang physical distancing, kag maggamit sang face mask.
Sa bahin naman sang zumba suno sa alkalde, hulaton lang ang mangin advisory sang Inter Agency Task Force.
Dugang pa sang alkalde, magapakigsapol siya sa mga bike enthusiasts agud ma istoryahan kun paano mas mapanami kag mas magamit sang bikers ang tagsa ka bikelane nga nahamtang sa mga dalanon sa syudad sang Iloilo.
Samtang, ginpahayag man sang alkalde nga sumugod sini nga adlaw, wala na sang limitasyon sa pagbakal sang ilimnon sa syudad sang Iloilo.
Suno kay Treñas, luyag lang niya ipahanumdum sa mga pumuluyo nga apisar wala na sang limitasyon sa baklanay sang ilimnon, indi sa gihapon mahimo nga dal-on ang mga ini pasulod sa probinsya sang Iloilo, bangud nagapadayun pa ang liquor ban santo sa executive order ni Iloilo Provincial Governor Arthur Defensor Jr.
Pahayag pa ni Treñas, sa tion nga dal-on sa probinsya ang mga ilimnon, ang nasambit nga akto makabig bayolasyon sa executive order sang gobernador.
(photo from Bworld online)
