ILOILO CITY – May yara sang apat ka ginatan-aw nga kabangdanan ang More Electric and Power Corporation kun ngaa masami nga nagaluntad ang power interruption sa pila ka bahin sa syudad sang Iloilo.
Sa interview sang Bombo Radyo kay Joy Fantilaga, Community Relations Officer sa idalom sang Customer Care Department sang MORE Power iya ginpahayag nga pila sa mga rason amo ang secondary wire down, overloaded transformer, low voltage kag hot spot connectors.
Suno kay Fantilaga, amat-amat na nila nga gina islan ang mga undersize nga secondary line agud malikawan ang masami nga pagluntad sang wala ginalauman nga pagbrownout.
Apang, ginpahayag sang natungdan nga sa subong indi pa mabatyagan ang resulta sang pagpakaayo nila sang ila mga pasilidad sa franchise area bangud pila palang ka bulan humalin sang nagtake over ang More Power Electric and Power Corporation bilang power distributor sa syudad sang Iloilo.
Dugang sang natungdan, mas ginpadasig kag mas mahapos nalang ang pag apply para sa bag-o nga konesksyon sa ila nga talatapan agud man malikawan ang ilegal nga koneksyon nga isa man sa ginatan-aw nila nga kabangdanan sang pag overload sang ila mga transformer nga masami nagaresulta sa pag brownout.
Liwat naman nga nagpanugyan si Fantilaga nga may yara sila sang ginapatigayon nga scheduled brownout kada Martes kag Huwebes sang aga bilang kabahin sang pagpahugot sang mga halog nga connectors kag terminals.
