ILOILO CITY – Ginkalipay sang pamilya Britanico kag Muller ang pormal nga pagpasaka sang kaso sa apat ka mga suspek sa pagpatay sa ila himata nga amo sanday Delfin Britanico kag Alain Muller.
Ang mga suspek amo sanday PCpl. Jerry Carmelotes Villanueva kag PCpl. Joseph Andrew Poneles Joven kag duha ka mga wala pa makilalan-an nga mga persona.
Sa interview sang Bombo Radyo sa anay mamalidha nga si Salvador Britanico kag amay sang biktima nga si Delfin Britanico apisar nga nagakasubo sila sa gihapon sa pagkapatay sang iya nga bata ginakalipay man nila ang panibag-o nga development sa kaso.
Suno kay Britanico, siya mismo ang makapamatuod nga wala sang kaangtanan ang iya bata kay Alain Muller nga amo ang una nga ginpatay sang mga suspek kag nadalahig lang ini.
Sa subong, hustisya sa gihapon ang ginasinggit sang ila nga pamilya agud madakpan na ang duha pa ka wala makilal an nga mga suspek.
Nagalaum man sila nga mangin seryoso ang Philippine National Police sa kaso agud mahatagan na sang kasanagan ang pagkamatay sang ila himata.
Samtang, wala man napunggan ni Annabel Estrella, tiya ni Alain Muller nga mangin emosyonal bangud matapos ang pila ka binulan may yara na sang panibag o nga development ang kaso sang iya nga hinablos.
Sa interview sang Bombo Radyo kay Estrella, tuman man ang ila pagpasalamat sa pamilya Britanico bangud paagi sa ila nangin mas madasig nga nahatagan sang kasanagan ang kaso sang pagkamatay sang ila himata.
Dugang sang natungdan, sa pihak sang tanan nga nagkalatabo sa ila nga pamilya wala sila nadulaan sang paglaom nga isa ka adlaw makuha nila ang hustisya.
Tuman man ang ila pagpasalamat sa National Bureau of Investigation nga amo ang nagpatigayon sang imbestigasyon bangud diri napasakaan na sang nagakaigo nga kaso ang mga nagpatay kay Alain Muller.
