ILOILO CITY– Madamo sang nakalinya nga aktibidad ang Philippine National Police sa pagpatigayun sang 25th Police Community Relations Month nga may tema ‘Pinaigting na ugnayan ng mamamayan at pulisya laban sa COVID-19 Pandemya’ sa maabot nga bulan sang Hulyo.
Sa interview sang Bombo Radyo kay Police Captain Rey Tolosa Jr., chief Community Affairs Section sang Regional Community Affairs Development Division sang Police Regional Office 6, iya ginpahayag nga kaupod nila sa pagpatigayun sang amo nga aktibidad ang National Police Commission.
Suno kay Tolosa, importante ang Police Community Relations, agud mas pabaskugon pa ang partipasyon kag pagbuligay sang komunidad kag kapulisan agud batuan, tapnaon sang kriminalidad, lakip na ang pagpahagan-hagan sang epekto sang pandemya.
Lakip sa mga aktibidad suno sa iya amo ang motorcade, kick off ceremony, pagpatigayun sang bloodletting apang may yara sang pagsunod sa minimum health standards, online poster making contest, tree planting, online got talent kag iban pa.
Dugang pa sang natungdan, gina-agda man nila ang publiko nga magpakigbahin sa pagsaulog sang Community Relations Month.
