ILOILO CITY – Posible nga ipaiway ang kaso nga ipasaka sang Iloilo City Government batok sa AC Energy matapos ang nagluntad nga oil spill sang naglupok ang power barge sa Zone 3 Bo. Obrero, Lapuz, Iloilo City.
Nahibaluan nga nagtuga sang dako nga perwisyo sa palangabuhian sang mga residente sa lugar kag sa mga kaiping nga barangay ang bunker fuel.
Sa interview sang Bombo Radyo kay Iloilo City Mayor Jerry Treñas, iya ginpahayag nga nalipay kag nakuntento siya sa ginhimo nga tikang sang AC Energy.
Suno kay alkalde, sang nadismaya siya sa nangin sitwasyon sang mga evacuees nga nagatulog lang sa salog sang mga eskwelahan kag mga gym, gilayon nga ginsaylo ang mga apektado nga residente sa hotel agud makatulog sang maayo.
Magluwas sini, madamo man sang mga programa ang AC Energy para sa edukasyon sang mga estudyante sa apektado nga mga barangay kag halimbawa na diri ang pagpakaayo sang mga eskwelahan.
Sa pihak sini, ginpasalig man sang alkalde nga mahatagan sang kompensasyon ang mga residente nga tuman nga naapektuhan sang oil spill.
