ILOILO CITY – Naga-ugtas na ang alkalde sang Dumangas, Iloilo sa wala untat nga reklamo batok sa Dumangas-Barotac Nuevo Water District.
Sa exclusive interview sang Bombo Radyo kay Mayor Ronaldo Golez, iya ginpahayag nga madamo na siya sang reklamo nga ginabaton halin sa mga konsumidor sang nasambit nga Water District.
Suno kay Golez, ginpalab-ot na niya sa Sangguniang Bayan ang reklamo agud mahatagan sang atensyon ang mga reklamo.
Makapila ka beses naman suno kay Golez nga ginpatawag niya si Engr. Remus Braganza, general manager sang nasambit nga water district, sa diin ginpaathag sang natungdan nga indi nila maperpekto ang serbisyo kag kun may yara sang reklamo, mahimo sila nga maghatag sang kumpleto nga detalye agud mahatagan sang kasolbaran ang problema.
Ginkumpirma man sang natungdan nga wala sang permit ang water district apang ginhatagan lang nila sang pabor agud indi maapektuhan ang pang-adlaw adlaw nga buluhaton sang mga residente nga nagakinahanglan sang tubig.
Bukas naman si Golez kun may bag-o nga water distributor nga luyag mag supply sa ila banwa.
Dugang pa sang alkalde, iya man nga ipalab-ot ang nasambit nga reklamo kay Iloilo Gov. Arthur Defensor Jr.
