ILOILO CITY – Duha ka factors ang ginalantaw nga rason kun ngaa-a nagatuhaw ang Asthma sa kabataan.
Sa pagpaathag sang medical expert nga si Dr. Teresa Martirez Hallegado, President, Philippine Pediatric Society Western Visayas Chapter, tubtub subong, indi pa matumod kun ano gid ang mayor nga rason apang santo sa pagtuon, may yara sang proposed factors kun nga-a nagatuhaw ang Asthma.
Suno kay Dr. Hallegado, ang duha ka factors amo ang genetics kag environment apang kun basehan ang sintomas, wala sang kinalain ang Asthma sa mga kabataan kag sa mga tigulang.
Ginpahayag ni Dr. Hallegado nga ang Asthma ang mahimo mapanubli paagi sa genes sang ginikanan kag may daku man nga epekto ang palibot nga gindaku-an sang bata.
Kabahin sa masami nga sintomas sang Asthma amo ang ubo ilabi na sa gab-i ukon kaagahon, mabudlay nga pagghinwa kag pagsakit sang dughan apang ang kinalain lang amo nga mas makapaathag sang maayo ang mga tigulang kun ano gid ang ila nabatyagan.
Kun may Asthma ang pasyente, lubos nga apektado amo ang tubo nga gina-agyan sang hangin sa baga kun sa diin nagahugot ang airways tuga sang pagpalamanog.
Gin-athag sang natungdan nga indi curable ang Asthma kundi mahimo lamang nga mahagan-hagan ang mabatyagan nga sintomas paagi sa pagtumar sang bulong kag iban pa nga medical treatment apang kun indi ini maagapan, mahimo nga bawi-an sang kabuhi ang pasyente.
