ILOILO CITY – Nagapadayon sa gihapon ang contact tracing sa mga na close contact sang staff ni Iloilo City Councilor Frances Grace Parcon nga nagpositibo sa Coronavirus Disease 2019 (COVID-19).
Sa exclusive interview sang Bombo Radyo kay Parcon, iya ginpahayag nga natumod na nila ang mga lugar nga ginpadulungan sang iya staff.
Suno kay Parcon, ang iya staff ang isa ka babaye, 25 anyos kag residente sang Rizal Pala-Pala II, Iloilo City.
Ginpahayag sang konsehal nga sa subong, indi pa matumod kun sa diin nga lugar nakuha sang iya staff ang COVID-19.
Lakip sa mga lugar nga ginpadulungan sang nasambit nga COVID-19 patient antes nagpaidalom sa reverse transcription polymerase chain reaction (RT-PCR) test amo ang Rizal Pala-Pala 2, Police Station No. 1 kag sa iya utod sa isa ka bangko sa syudad sang Iloilo.
Gilayon man nga ginpasirado ni Parcon ang iya opisina kag nagpaidalom sa 14-day quarantine period ang mga kaupod nga empleyado sang nasambit nga COVID-19 patient.
Mangin ang konsehal ang nagpaidalom man sa quarantine kag natalana nga magpaidalom sa RT-PCR test.
