USA – Ang pag-inom sang madamo nga tubig sa sulod sang isa ka adlaw ang masami nga ginapanugyan agud nga makalikaw sa dehydration.
Magluwas diri, ini ang makapaayo man sa tanan nga nagapaidalom sa diet.
Sa pagpa-athag ni Dr. Tammy Chang, assistant professor of family medicine sa University of Michigan Medical School, ang regular nga pag-inom sang tubig ang makapanubo sang Body Mass Index sang tawo.
Halos 50% suno kay Chang ang kahigayunan nga makalikaw sa obesity ukon tuman nga katambukon.
Suno naman kay Connie Diekman, director of university nutrition sa Washington University sa Estados Unidos, ang paglikaw sa dehydration ang indi lamang paagi sa pag-inom sang tubig kundi paagi man sa pagkaon sang prutas kag laswa.
Gin-athag man ni Diekman nga mas ginakinahanglan sang mga matambok nga tawo nga magkaon sang prutas kag laswa.
Ginapanugyan naman sang mga eksperto nga 3.6 liters sang tubig ang dapat nga mainom sang mga lalaki sa sulod sang isa ka adlaw samtang 2.7 liters naman para sa mga babayi.
