MANILA – Nagapati si Iloilo 5th District Rep. Raul “Boboy” Tupas nga wala sang lamud pamulitika sa temprano nga pagpasar sang P4.5 trillion nga 2021 national budget sa second reading sa Kamara.
Ini ang kasunod sang natabo nga viva voce voting kun sa diin lusot na sa ika duha nga pagbasa ang House Bill No. 7727 ukon General Appropriations Bill kag mas napatemprano ang break sang mga mamalidha.
Sa interview sang Bombo Radyo kay Tupas, iya ginpahayag nga si House Speaker Alan Peter Cayetano ang nag-mosyon kag naghatag sang speech kun sa diin gintalakay niya ang national budget para sa masunod nga tuig.
Suno kay Tupas, indi mahinago nga sa subong, mainit ang isyu tuhoy sa House speakership post sa tunga nanday Cayetano kag Marinduque Rep. Lord Allan Velasco apang mas mabug-at ang isyu kun maatrasar naman ang pagpasar sang pondo.
Ginpahayag ni Tupas nga indi na kun tani matabo ang pagkaatrasar sang national budget ilabi na subong nga may yara sang pandemya kag kinahanglan nga pondohan ang COVID-19 response sang gobyerno.
Ang reyalidad sa Kamara sa subong suno sa natungdan amo nga si Cayetano sa gihapon ang House Speaker kag kalabanan nga party leaders ang nagasuporta sa iya.
