GUIMARAS – Ginpakigbahin sang isa ka bulag ang pagpangabuhi bilang isa ka amay matapos ginbulagan sang iya tiayon.
Sa interview sang Bombo Radyo kay Joselito Galleto sang Constancia, San Lorenzo Guimaras, iya ginpahayag nga gapang-oling siya sadto kag nagapanguma sang wala pa siya nabulag bilang kabahin sang ila palangabuhian.
May apat siya ka mga kabataan sa diin ang subang kag ikaduha ang lunsay babaye kag mga lalaki naman ang ikatatlo kag ikaapat niya nga anak.
Sang nagapang-oling siya, aksidente nga napiskan ang iya duha ka mata tubtub nabulag.
Naglain na suno sa natungdan ang pagtrato sang iya tiayon humalin sang nabulag ang iya mga mata kag ginadalukan pa siya sang pagkaon.
Isa ka tuig na ang nagligad, nagdesisyon ang tiayon ni Galleto nga mag-upod sa iban nga lalaki kag gindala pa ang ila ikatatlo nga anak.
Ang malain pa suno sa natungdan kay classmate pa niya sang Elementary ang lalaki nga ginbulos sang iya misis kag pareho pa nga ‘Lito’ ang pangalan.
Apang ang ikatatlo nila nga anak ang gindala sang iya tiayon.
“Punggan ko man siya tani eh galing anhon ko na kay wala na siya ya naluyag,” pahayag ni Lito.
Mangin ang pamilya sang tiayon ni Galleto ang nagpanugyan na lang nga magbalik na lang siya sa luyo sang iya ginikanan kag batunon na lang ang ila sitwasyon.
Sa pihak sini, desidido si Galleto nga mapatapos sa pagtuon ang iya mga kabataan, apisar tuman ka pigado ang ila kabuhi ilabi na subong nga may pandemya.
“Gapangayo gani sila bisan cellphone lang, ti anhon ta na bi kay wala kita inugbakal,” dugang pa ni Lito.
