MANILA – Tuman ka poderoso ang mangin isa ka House Speaker.
Ini ang ginpahayag ni Atty. Joenar Pueblo may kaangtanan sa isa sa mga mainit nga isyu sa pungsod antes pa man napasar sa third and final reading ang P4.5 trillion nga national budget para sa 2021.
Sa programa Dura Lex Sed. Lex, ginpahayag ni Atty. Pueblo nga ang House Speaker ang ika-apat sa pinakamataas nga opsiyal sa Pilipinas sunod sa Presidente, Bise Presidente kag Senate President.
Magluwas diri, naga-umpisa man sa House of Representatives ang tanan nga money related concerns sa pungsod kasubong sang national budget antes ipasa sa Senado para sa joint committee hearing.
Ang House Speaker suno kay Atty. Pueblo ang dapat nga kaalyado sang Presidente bangud nga ang ang rule of thumb sa Kamara amo ang majority rule.
Sa pagpili sang House Speaker suno kay Atty. Pueblo, kinahanglan nga ini ang ipaagi sa nominal voting kag ang may pinakamadamo nga boto ukon nakakuha sang majority vote amo ang magadaug.
Wala sang termino ang pagserbe nga pinuno sang Kamara bangud nga bisan ano oras, mahimo siya nga ilisan sa tion nga indi na kuntento ang iya mga kaupod nga mamalidha.
Tuhoy naman sa isyu sa tunga nanday Taguig-Pateros Rep. Alan Peter Cayetano kag Marinduque Rep. Lord Allan Velasco, ginpahayag sang natungdan nga ang tagsa ka kampo ang may yara man sang panindugan.
Sang adlaw nga natabo ang pagboto sang 186 ka mamalidha pabor kay Velasco, nagapati ang kampo sang Marinduque Representative nga bisan ano pa ang matabo, ang mayorya sa gihapon ang magapangibabaw samtang sa bahin naman ni Cayetano, ila nga ginpunggan ang tuyo sang pihak nga kampo.
Ini ang rason suno sa natungdan kun nga-a sa guwa sang Batasang Pambansa natigayon ang pagbinotohay para kay Velasco bangud nga ginsirado ang plenary hall.
