ILOILO CITY – Nagdepensa ang pamunuan sang Qualimed Hospital matapos ginapahayag ginbalibaran ang isa ka nagabusong nga pasyente tubtub sa taxi na lang nagbata.
Sa interview sang Bombo Radyo Iloilo kay Ms. Dara Coloso, Physicians and Customers Relations Associate Manager sang Qualimed Hospital, iya ginpahayag nga sang nagpadulong ang nagabusong nga iloy sa ila ospital, gina-disinfect pa ang ila isolation area.
May kahigayunan man suno sa natungdan nga sa isolation area nagabata ang mga nagabusong nga ginadala sa ila ospital.
Apang sang amo nga tion, bag-o lang gin-disinfect ang isolation area bangud may pasyente sila nga may infectious disease.
Magluwas sini, wala man siya sang may ginpakita nga negative reverse transcription polymerase chain reaction (RT -PCR) test.
“Ang tuod-tuod nga rason ngaa wala siya namon na accomodate diri, kay ang amon nga isolation is occupied that time. Kay ti syempre wala pa siya sang negative RT-PCR test result. So ang isa ka butang nga ginahimo namon is may ginabutang kami nga isolation tent sa gwa sang ER ang triage tent na bala namon,” pahayag ni Coloso.
Apang sa ulihi, nagkambyo naman ang iya pahayag sa diin iya ginhambal nga pag-abot sang pasyente, bag-o lang may nagwa nga infectious nga pasyente rason nga indi nila mapagamit ang triage tent.
“Ugaling pag-abot ya bag-o lang gid ginhalinan sang infectious nga pasyente,” dugang pa ni Coloso.
Suno kay Coloso, ginpanugyan man sang ila obstetrician-gynecologist (OB-GYN) nga magsaylo na lang ini sa iban nga ospital antes pa nagbata.
“Ang gin-advice na lang kag naga communicate man ang amon OB-GYN sa iya doktor nga pasayluhon na lang siya samtang temprano pa samtang wala pa nakagwa ang iya bata sa malapit nga hospital basi may ara didto sang bakante which is ang Medicus,” paathag ni Coloso.
Apang wala na ini makalab-ot pa sa Medicus Medical Center kag nagbata na sa sulod sang taxi.
“Galing unfortunately on her way to Medicus, nagwa ang iya bata.”
Nahibaluan nga kun normal delivery, nagakadapat nga magpakita ang nagabusong sang RT-PCR Test nga may 2 weeks validity kag 1 week naman nga validity kun caesarean delivery.
Sa kaso sang iloy nga nagpadulong sa ila ospital, ginpahayag ni Coloso nga antes ang iya pagbata pa lang siya nagpaidalom sa RT-PCR test.
