ILOILO CITY – Ginahandaan na sang Syudad sang Iloilo ang homecoming ni Miss Universe Philippines 2020 Rabiya Mateo.
Sa interview sang Bombo Radyo kay Iloilo City Mayor Jerry Treñas, iya ginpahayag nga tuman ang kalipay sang syudad sang Iloilo matapos nagdaog si Rabiya sa Miss Universe Philippines 2020.
Suno kay Treñas, makabig nga moral booster ang pagdaog ni Rabiya nga sa pihak sang pandemya may yara sang kadalag-an.
”Nagacongratulate gid kita kay Ms. Rabiya. Nagapasalamat gid kita nga ginhatagan sang kahigayunan ang Syudad sang Iloilo nga magrepresentar sa Miss Universe. Iloilo City is very happy that we have given this honor kag damo ini nga boost sa morale sang mga Ilonggo,” pahayag ni Treñas.
Ginpahayag sang alkalde nga indi lang siya beauty queen kundi nagapalapit gid sa mga front liners kag nagpadulong man sa sanitary landfill sa Calajunan Mandurriao, Iloilo City.
Ginkakibot kag gindayaw man sang alkalde ang nangin sabat ni Rabiya sa Top 5 question and answer portion sa diin ginpili niya nga ibutang ang nawong ni the late Senator Miriam-Defensor Santigo kun hatagan siya sang kahigayunan nga maghimo sang bag-o nga papel nga kwarta.
Sa pagpuli naman ni Rabiya, ginpasigurado sang alkalde nga masunod sa gihapon ang minimum health protocol sa diin ginalauman nga magadugok ang mga tawo sa iya homecoming.
