ILOILO CITY- Pinay ang una nga nakabaton sang COVID-19 vaccine sa Ontario, Canada.
Suno kay Bombo International Correspondent Nowell Patrick Arnill Panes Relatos, direkta sa Canada, ginhandpick sang gobyerno sang Canada si Anita Quidangen, isa ka caregiver kag isa na ka Canadian citizen agud magbaton sang Pfizer-BioNTech COVID-19 vaccine.
Suno kay Relatos, prayoridad sang Canadian government nga una nga hatagan sang bakuna amo ang mga healthcare workers kag mga residente sang retirement homes.
Pahayag ni Relatos, napilian si Quidangen bangud sa dedikasyon niya sa trabaho sa diin naga double shift pa ini bilang personal support worker sa isa ka Rekai Centre nursing home sa Toronto.
Magluwas kay Quidangen, duha pa ka mga healthcare workers nga may Filipino heritage ang nalakip man sa una nga lima ka recipients sang bakuna.
Ini amo sanday Cecile Lasco nga isa ka health worker kag Lucky Aguila nga isa ka registered practical nurse.
Nahibaluan nga target sang Canada nga makakuha sang 249,000 doses sang bakuna antes magtakop ang tuig apang nagahulat pa ini sang 20 million doses gikan sa Pfizer-BioNTech.
