Tatlo ka tawo ang patay kag isa ang missing sa bangud sa paglaslas sang Bagyo Vicky sa Agusan del Sur.
Suno kay Agusan del Sur Gov. Santiago Cane Jr., ang duha ka mga napatay ang nalumos matapos nagtabok sa suba.
Samtang ang isa naman ka napatay ang isa ka empleyado sang Department of Environment and Natural Resources sa diin ginpilit sini nga magtabok sa nagabaha nga highway kaupod sang isa asawa sakay sang motorsiklo.
Nakaluwas naman ang asawa sang nasambit nga government employee sa aksidente.
“Fortunately, his wife was rescued by residents in the area, but the body of the husband was not found that afternoon. His body was only found the following day, which was yesterday,”pahayag ni Cane.
“We are just taking care of evacuees who haven’t been able to go back home. Some of them lost their homes and there are also those whose houses are still under water,” dugang pa sang natungdan.
Samtang suno naman kay Cagayan Gov. Manuel Mamba, ang level sang tubig sa ila lugar ang yara na sa critical status kag naglab-ot sa 11 meters kag padayon nga nagataas.
Nagdangat naman sa 2,500 ang mga narescue nga indibidwal.
Suno naman kay Isabela Gov. Rodito Albano, 10 ka mga banwa ang apektado sang pagbaha sa diin 1,000 na ang narescue.
Sa separado naman nga update sang National Disaster Risk Reduction and Management Council, nagdangat sa 1,590 ka pamilya ukon 6,702 ka indibidwal sa 57 ka mga barangay sa Caraga kag Davao region ang nalakip sa mga apektado sang bagyo.
Sa nasambit nga numero, 1,328 ka pamilya ukon 5,464 ka indibidwal ang yara na sa 58 ka mga evacuation centers.
Samtang 43 ka pamilya ukon 275 ka mga indibidwal ang yara sa gwa sang mga evacuation centers.
Sa Caraga, kabug-usan nga P105.4 million ang halit sa imprastraktura.
83 naman ka mga balay naman ang naguba sa Cebu.
Suno naman sa Philippine Coast Guard, 142 ka mga drivers kag kabulig ang stranded sa Palawan.
