ILOILO CITY- Nagasulobra lang ang COVID-19 vaccines sa mga local hospitals sa Estados Unidos.
Sa interview sang Bombo Radyo kay Dr. John Tacapan, Bombo International Correspondent direkta sa California, iya ginpahayag nga may yara sang mga medical workers nga nagpamalibad nga magpatublok sang bakuna rason kun ngaa may yara sang surplus sang vaccines.
Suno kay Dr. Tacapan, may iban nga frontliners nga indi luyag magbaton sang bakuna bangud ginadumilian ini sa ila kultura kag relihiyon.
Pahayag sang natungdan, ang mga surplus nga bakuna ang ginpakamaayo nalang nga itublok sa mga pamilya sang mga frontliners nga una na nga nahatagan sang una nga dose sang COVID-19 vaccine.
Nahibaluan nga gin-target sang gobyerno sang Estados Unidos nga ma-administer ang P20M doses sang bakuna sa pagtakop sang 2020 apang tubtob subong, yara pa lang ini sa 4M doses.
Samtang, sa tunga sang padayon nga mass vaccination, nagataas sa gihapon ang kaso sang COVID-19 sa US.
Suno kay Tacapan, madamo man sa gihapon ang nagakapatay adlaw-adlaw kag ini ang rason kon ngaa gina-reject nalang sang iban nga mga punerarya ang pagbaton sang mga napatay bangud sa COVID-19.
