Hugot nga ginpamatukan ni Iloilo 3rd District Representative Lorenz “Nonoy” Defensor ang pagbasura ukon pagterminate sang University of the Philippines-Department of National Defense (UP-DND) Accord nga amo ang kasugtanan nga nagadumili sang pagsulod sang militar kag pulis sa mga campus sang unibersidad kun wala sang pahanugot sang pamunuan sang eskwelehan.
Sa interview sang Bombo Radyo kay Defensor, iya ginpahayag nga indi niya maintindihan kun ngaa subong pa ibasura ang madugay na nga kasugtanan sa diin yara sa tunga sang pandemya kag wala man sang rally nga nagakatabo sa mga campus sang UP.
Suno kay Defensor, ang UP ang nangin sanctuaryo nga sang economic freedom kag freedom of expression and speech.
Samtang ginpakamalaot man ni Defensor ang pagpang red tag ni Armed Forces of the Philippines (AFP) deputy chief of staff for intelligence Maj. Gen Alex Luna matapos nagpaggwa sang lista sang UP Alumni nga ginpahayag nagsulod sa New People’s Army.
Ang pagpangred tag ang gintawag man ni Defense Secretary Delfin Lorenzana nga isa ka “unforgivable lapse”.
Ginpahayag ni Defensor nga nagakadapat nga giyahan ang mga nagapamatok sa UP-DND Accord bangud makahuluya ang ila ginabuhat sa mga taga UP.
“They have to get their intelligence first, they have to get their guidance kun ano anay ang himuon nila bag-o nila i-terminate ang isa ka bagay nga wala man lang sang pabalo, nagred tag sila tapos sala man lang gali, indi kinahanglan sang amo sina nga aksyon halin sa gobyerno” dugang pa sang natungdan.
