Wala pa sa gihapon sang bulong ang balatian nga ‘lupus’ apang mahimo nga ma-manage ang mga sintomas sang nagasuprir sini.
Sa interview sang Bombo Radyo kay Dr. Elvin Tiangha, iya ginpahayag nga ang balatian nga lupus amo ang isa ka ‘autoimmune disease’ sa diin ginaatake sang lawas sang tawo ang kaugalingon nga mga organ.
Posible nga maapektuhan sang nasambit nga balatian ang joints, panit, kidneys, blood cells, utok, tagipusuon kag baga sang tawo.
Suno kay Tiangha, ang lupus ang masami naga-igo sa mga babayi nga naga-edad sang 15 tubtob 45 anyos.
Lakip sa mga sintomas sang balatian suno kay Tiangha amo ang tuman nga kapoy, mataas nga hilanat, kabudlay sa pagginhawa, pagpula sang panit kag pagkadula sang memorya.
Ginpahayag ni Tiangha nga isa sa pinakadako nga komplikasyon sang balatian nga lupus amo ang kidney failure nga masami ginatunaan sang kamatayon.
Nagpanugyan man ang doktor sa mga may balatian nga lupus nga magsunod sa abiso sang doktor.
Kung mas temprano nga matumod suno kay Tiangha ang balatian nga lupus, mas madasig ini nga mabulong.
