ILOILO CITY- Padayon pa nga ginausisa sang pamunuan sang Hospital Management Office sang Probinsya sang Iloilo ang reklamo sang mga personnel sang Rep. Pedro G. Trono Memorial District Hospital sa Guimbal, Iloilo may kaangtanan sa kulang nga sweldo.
Ini matapos naggwa ang impormasyon nga nagatungaay nalang sang sweldo ang mga contract of service sa amo nga district hospital bangud ginapahayag nga wala sang budget.
Sa interview sang Bombo Radyo kay Dr. Cynthia Cabangal- Ng, head sang Hospital Management Office, iya ginpahayag nga sa subong, wala siya sang konkreto nga mga detalye angot sa isyu bangod wala man sang formal complaint nga nabaton ang iya talatapan.
Suno kay Cabangal- Ng, mas maayo nga personal nga makig-angot ukon makigsugilanon sa iya ang natungdan nga mga tagreklamo agud ila ini maistoryahan kag mahisayran.
May kaangtanan naman sa funding para sa sweldo, gin-ako sang natungdan nga ginkulang gid man sadto sa funding kasunod sang paghire sang mas madamo nga medical workers bangod sa pandemya rason kon ngaa may yara sang supplemental budget.
Sa subong, suno sa iya, ang supplemental budget ang yara na lebel sang Committee on Appropriations sa Sangguniang Panlalawigan.
