Tatlo ka bulan nga magatinir anay sa Thailand ang tiglawas sang Myanmar sa Miss Grand International bangud sa kahangawa nga arestuhon siya sang militar kun siya ang magabalik sa iya pungsod.
Matandaan nga nangin viral sa social media ang nangin speech ni Miss Grand Myanmar Han Lay kun sa diin nagpanindugan siya batok sa kalakasan nga ginahimo sang mga katapo sang militar sa Myanmar halin sang ginpatuman ang kudeta sang Pebrero 1.
Sa Miss Grand International Pageant, nagahibi nga nagpangayo sang bulig si Han Lay halin sa lain-lain nga pungsod ilabi na bangud ginatos na ka mga protesters ang napatay sa Myanmar.
“Today in my country Myanmar … there are so many people dying. Please help Myanmar. We need your urgent international help right now,” kabahin sang iya pa-apelar sang bulig.
Bangud sang iya duha ka minutos nga speech, nagakahangawa ang 22 anyos nga beauty queen nga mabutang siya sa radar sang militar. Gin-ako niya nga antes siya maghalin sa iya pungsod para sa Miss Grand International pageant, nakahibalo siya nga ginabutang niya sa risgo ang iya kaugalingon.
Labi pa nga nagdaku ang iya nga kahangawa bangud sang nagligad nga semana, nag-isyu ang security forces sang arrest warrant sa 18 ka mga artista kag social media “influencers” kag duha ka journalists bangud sa ginapahayag pagsapubliko sang materyal “intended to cause a member of the armed forces to mutiny or disregard their duty”.
Suno kay Han Lay, wala pa man siya ginkontak sang militar halin sang ginpatigayon ang pageant apang may mga nabaton siya nga mga pagpamahog sa iya nga social media accounts. May mga nagapadala man sang mensahe sa iya nga nagahulat ang presuhan sa iya liwat nga pagbalik sa Myanmar.
Safe man suno sa iya ang iya nga pamilya apang mabudlay ang pag-communicate sa ila bangud masami nga ginautod ang internet connection sa ila nga pungsod.
ahibaluan nga sang nagligad nga bulan, isa man si Han Lay sa mga nag-gwa sa dalanon sa Yangon agud magprotesta batok sa militar. Ang kaupod niya sa amo nga protesta ang gin-aresto sang mga pulis.
Santo sa record sang activist group nga Assistance Association for Political Prisoners (AAPP), kapin 2,500 ka tawo na ang naaresto sa Myanmar bangud sang military crackdown.
Sa subong, masobra naman sa 550 ang patay kag masobra 40 diri amo ang mga kabataan.
