BINGAWAN, ILOILO – Wala sang problema kay Bingawan, Iloilo Mayor Mark Palabrica nga nalakip siya sa priority group kag unahon nga bakunahan batok sa COVID-19.
Si Palabrica ang lakip sa anum ka mga alkalde sa probinsya sang lloilo nga gintumod nga halin sa ‘critical and high risk areas’ kag gindala sang National COVID-19 Vaccination Operations Center sa Priority Group A1.5.
Sa interview sang Bombo Radyo kay Palabrica, iya ginpahayag nga i-avail niya ang Sinovac COVID-19 vaccine bangud maayo man ang iya nga kondisyon kag wala sang comorbidities.
Nagapati si Palabrica nga daku sini ang mabulig sa iya sa trabaho bilang alkalde sa Bingawan kag sa pagpatigayon sang epektibo nga COVID-19 response.
As of April 8, wala sang active case sang COVID-19 sa amo nga banwa.
Halin sang nag-umpisa ang pandemya, 39 ang kabug-usan nga kumpirmado nga kaso kag wala sang reported deaths.
Suno kay Palabrica, madasig nga isolation kag contact tracing ang ila sekreto rason nga nagakapapas gilayon ang virus.
